Þessiindónesíska hnetudressing er mjög góð og bragðmikil - sterk, súr, sölt og sæt. Ég gerði hana fyrst með indónesíska salatinu Gado Gado sem var fyrsta (og vinsælasta) uppskriftin á Eldhúsatlasnum. Hnetudressingin er frábær með Gado Gado, sem salatdressing, ídýfa fyrir grænmeti, á núðlur, tófú og ofnbakað grænmeti...og bara hvað sem ykkur dettur í hug.
Uppskriftin er ekkert heilög og það er hægt að nota hana sem grunn. Það má nota mikið meiri hvítlauk eða minna chili. En ef þið notið ekki sykur myndi ég mæla með því að minnka límónusafann verulega. Límónan og tamarind maukið gefa mikla sýru og sykurinn er nauðsynlegur til að vega upp á móti henni.
Innihaldsefni
- 1 hvítlauksgeiri
- 3 tsk af hrásykri *
- 130 gr gróft ósætt hnetusmjör
- 1-2 grænir chilipiprar
- Safinn úr tveimur límónum
- 1 msk tamarind mauk
- 1 ½ msk sojasósa
* Í Indónesíu væri notaður pálmasykur. Ég held að hann fáist hér á landi og ætla að prófa það næst.
