Otai-loka

Vatnsmelónudrykkur frá Tonga

Tonga

Otai

23/196


Gleðilegt sumar kæru lesendur! Nú er kominn tími á sumarlegri uppskriftir á Eldhúsatlasnum og ég ætla að byrja á einni frá litla konungsdæminu Tonga í Kyrrahafi. Otai er frískandi og sumarlegur vatnsmelónudrykkur með kókosmjólk, ananas og límónusafa. Það er víst ekki þverfótað fyrir vatnsmelónum á þessari paradísareyju og íbúarnir drekka Otai til að svala þorstanum í steikjandi sumarhitanum.

Ég gerði ekki alveg hefðbundna uppskrift að Otai vegna þess að í Tonga væru ávextirnir stappaðir og blandað saman við kókosmjólk, limesafa og vatn. Ég set hinsvegar allt í blandara til að það sé auðveldlega hægt að drekka drykkinn með röri.

Það er hægt að gera drykkinn enn hollari og nota kókosvatn í stað mjólkur. Það er líka hægt að breyta Otai í rommkokteil og þá er gott að hafa aðeins meiri ananas, kókosmjólk og hunang eða sykur.




Otai rommkokteill


  • Connector.

    1.

    Otai er óáfengur svaladrykkur en það er auðvelt að breyta honum í rommkokteil. Þá er gott að hafa aðeins meiri límónu, ananas og kókosmjólk í blöndunni.

  • Connector.

    2.

    Setjið 1 – 2 cl. af ljósu rommi í glas og leysið ca. teskeið af sykri eða hunangi upp í áfenginu. Það er líka gott að nota sykursíróp ef þið nennið að búa það til.

  • Connector.

    3.

    Setjið klaka í glasið og fyllið upp í með Otai. Smakkið til með límónusafa.


Innihaldsefni



• Hálf vatnsmelóna
(1300 gr. með hýði / 1000 gr. án hýðis)
• 2 ferskir ananashringir (ca. 200 gr.) *
• 1 ½ dl af feitri kókosmjólk eða kókosrjóma
• Safi úr hálfri límónu
• Örlítið hunang
• Svolítið vatn
• Klakar


Þessi uppskrift gefur 1,2 L.

Leiðbeiningar


1. Skerið ávextina í bita (best er að nota kalda ávexti).

2. Setjið öll innihaldsefnin í blandara og blandið í smástund. Það má alveg vera svolítið gróf áferð á drykknum. Bætið við vatni eftir þörfum og smakkið til með límónusafa, hunangi og kókosmjólk.

3. Berið fram með fullt af klaka!

Þessi hlutföll eru alls ekkert heilög. Ég skoðaði margar uppskriftir og þær voru mjög ólíkar. Það má nota kókosvatn í stað mjólkur, mangó í staðinn fyrir ananas og bæta við sykri og vatni. Það má líka nota mikið meiri kókosmjólk eða sleppa henni og nota kókosvatn.


Leave a Reply

Your email address will not be published. Required fields are marked *

sixteen + 10 =