baba

Sýrland: Baba Ganoush

Sýrland

Baba Ganoush

16/196


Hér kemur önnur uppskrift frá Sýrlandi. Ég var búin að prófa að gera Muhammara, sem er ídýfa úr grilluðum paprikum og valhnetum. Svo komst ég að því að Baba Ganoush á rætur að rekja til Sýrlands og ákvað að bæta þeirri uppskrift við. Þetta skemmtilega nafn – Baba Ganoush þýðir víst ,,dekurpabbi ” og sagan segir að nafnið sé tilkomið vegna þess að uppskriftin hafi verið búin til í kvennabúri. Það er ekki eins skemmtilegt.

Þetta er silkimjúk ídýfa úr grilluðu eggaldini, tahini og hvítlauk. Hún minnir svolítið á hummus en er þó mikið léttari. Hún passar vel með brauði, niðurskornu grænmeti og á samlokur.

Þessi uppskrift er frekar lítil og gefur eina litla skál. Þegar ég geri Baba Ganoush næst mun ég tvöfalda eða þrefalda uppskriftina. Svona fyrst maður er að hafa fyrir því að grilla eggaldin. Ég grillaði eggaldinið í ofninum en ætla að prófa að grilla það á útigrilli í sumar.

Innihaldsefni


• 1 stórt eggaldin
• 2-3 msk. ljóst tahini
• 1-2 msk. ferskur sítrónusafi
• 1-2 hvítlauksgeirar*
• 1 msk. ólífuolía
• 1/2 tsk salt (eða eftir smekk)
• Klípa af cumin
• Steinselja**

* Það er einnig hægt að nota bakaðan hvítlauk og fá þannig mildara og sætara bragð.

**Það er áreiðanlega mjög gott að bæta við ferskri myntu.



leiðbeiningar


1. Byrjið á því að hita grillið í ofninum.

2. Stingið göt á eggaldinið með gaffli og setjið undir grillið í ca. 20 mínútur. Snúið því reglulega til að það grillist jafnt. Það á að verða alveg lungamjúkt að innan.

3. Leyfið eggaldininu að kólna aðeins áður en þið skafið eggaldinkjötið innan úr hýðinu. Ekki láta neinn safa fara til spillis!

4. Setjið eggaldinkjötið í matvinnsluvél eða blandara ásamt öðrum innihaldsefnum og blandið vel. Það er einnig vel hægt að stappa eggaldinið með gaffli ef þið eigið hvorki matvinnsluvél né blandara. *

5. Smakkið til með sítrónusafa, hvítlauk, salti og cumin.

6. Berið fram með góðu brauði, niðurskornu grænmeti eða tortilla flögum.

* Byrjið á einni matskeið af sítrónusafa og hálfu hvítlauksrifi. Bætið svo við eftir smekk.

Leave a Reply

Your email address will not be published. Required fields are marked *

fifteen + twenty =