ALT="Vegetarian, black beans, rice,3 MB"

Kúba: Frijoles Negros (v)

Kúba

Frijoles negros

3/196


Hér er uppskrift að klassískum kúbönskum rétti úr svörtum baunum. Uppskriftin er einföld en það tekur svolítinn tíma að undirbúa matseldina. Það þýðir ekkert að nota baunir úr dós í þennan rétt. Frijoles Negros er þykkur og dásamlega góður baunaréttur…eiginlega rjómakenndur. Það er gott að bera hann fram með söxuðum lauk, fersku kóríander, fersku grænu chili og miklum limesafa. Hrísgrjón eru svo ómissandi meðlæti.

Innihaldsefni



• 1 ¼ bolli svartar baunir
• 4 ½ bollar vatn
• 1-2 grænar paprikur
• Stór laukur
• 2 hvítlauksrif
• 1 tsk cumin
• 1 tsk oregano
• 1 ½ msk rauðvínsedik
• ¾ bolli rauðvín
• 1 tsk sykur
• 1 lárviðarlauf
• 2 msk ólívuolía
• Salt og svartur pipar eftir smekk

Leiðbeiningar


1.Leggið baunirnar í bleyti yfir nótt eða samkvæmt leiðbeiningum á pakka.
2. Hellið vatninu af og setjið baunirnar í pott.
3. Setjið 4 1/2 bolla af nýju vatni og 1 msk. af ólívuolíu. Látið suðuna koma upp. Lækkið hitann og setjið lokið yfir og látið baunirnar sjóða þar til þær verða meyrar eða í um það bil klukkustund. Það er mikilvægt að salta baunirnar ekki á þessu stigi og það má ekki hella vatninu af baununum.
4. Saxið niður laukinn og paprikuna og steikið í ólívuolíu.
5. Bætið við hvítlauk, salti og pipar eftir smekk og steikið í 1-2 mínútur í viðbót.
6. Hellið baununum (með suðuvatninu) út á pönnuna og bætið við rauðvíni, ediki, lárviðarlaufi, cumini og oregano. Setjið lok yfir og leyfið réttinum að krauma í 20 mínútur. Hrærið í af og til.
7. Fjarlægið lárviðarlaufið. Takið ½ bolla af baunum og búið til þykkt mauk og bætið aftur út í réttinn. Þá verður hann þykkari og betri. (Til dæmis með töfrasprota eða mortéli).
8. Bætið við 1-2 tsk. af sykri og meira salti og pipar eftir smekk
9. Takið pönnuna af hellunni, dreifið einni msk. af ólívuolíu yfir réttinn, setjið lokið á og látið hana standa í 10 mínútur.

Berið fram með hrísgrjónum, fullt af limesafa, fersku kóríander og söxuðum lauk!

Fyrir ca. 4 – 5

Leave a Reply

Your email address will not be published. Required fields are marked *

eleven + 3 =