Spaghetti pangrattato

Ítalía

Spaghetti con pangrattato

13/196


Eldhúsatlasinn er kominn aftur eftir laaaangt frí! Lágkolvetnalífstíllinn er ekki í miklu uppáhaldi hjá mér og þessi ítalska uppskrift er ekkert nema kolvetni á kolvetni ofan.

Spaghetti con Pangrattato er mjög einfaldur og heiðarlegur ítalskur sveitamatur. Pangrattato, steikt krydduð brauðmylsna, er stundum kölluð parmesan fátæka mannsins. Uppskriftin á uppruna sinn á suður Ítalíu þar sem fátæklingar gripu til þess ráðs að steikja brauðmylsnu með kryddum til þess að nota í stað Parmesan út á pastarétti.

Þegar ég kaupi súrdeigsbrauð í bakaríi þá klárast það aldrei alveg allt og ég bý alltaf til grófa brauðmylsnu úr restinni. Mér þykir mjög þægilegt að elda þennan rétt eftir annasaman dag því ég á alltaf til svona brauðmylsnu tilbúna í frystinum.

Í þennan rétt er best að nota grófa heimagerða brauðmylsnu og það er tilvalið að nota gamalt brauð sem er orðið svolítið þurrt. Enga matarsóun hér!




Heimagerð brauðmylsna


  • 1.

    Í þennan rétt er best að nota grófa heimagerða brauðmylsnu og það er tilvalið að nota gamalt brauð sem er orðið svolítið þurrt. Í þessa brauðmylsnu notaði ég þrjár stórar súrdeigsbrauðsneiðar.

  • 2.

    Setjið brauðsneiðarnar í matvinnsluvél og búið til frekar grófa mylsnu.

  • 3.

    Dreifið brauðmylsnunni á bökunarpappír og bakið í ca. 20 mínútur við 100 gráður. Fylgist vel með og gætið þess að mylsnan dökkni ekki of mikið.


Innihaldsefni


• 200 gr. gott spaghetti

• 1-2 litlar lífrænar sítrónur eins og fást í Frú Laugu (1-2 tvær því það er mjög mikið smekksatriði hversu mikil sítróna má vera í réttinum og best er að prófa sig áfram og smakka réttinn til)

• 100 gr. gróf brauðmylsna (t.d. úr góðu súrdeigsbrauði en athugið að gróft brauð henatr illa í þessa uppskrift)

• 7 msk. Extra virgin ólífuolía

• 3 hvítlauksgeirar (eða fleiri eftir smekk)

• Ferskt timían eftir smekk

• Steinselja

• Þurrkaður eða ferskur rauður chilipipar

• Salt og pipar

Leiðbeiningar


1. Hitið 4 msk. af ólífuolíu á pönnu við vægan hita. Steikið brauðmylsnuna með timían þar til hún verður fallega gulbrún og stökk. Það tekur ca. 5 mínútur en á síðustu mínútunni skuluð þið bæta einu söxuðu hvítlauksrifi út á pönnuna.

2. Saltið og piprið og setjið brauðmylsnuna á eldhúspappír.

3. Sjóðið spaghetti samkvæmt leiðbeiningum á pakka. Hellið vatninu af spaghettíinu en geymið nokkrar matskeiðar af suðuvatninu.

4. Hitið 3 msk. af ólífuolíu á pönnu og steikið 1-2 hvítlauksrif (eða fleiri eftir smekk) og ferskt eða þurrkað chili við vægan hita.

5. Setjið spaghettíið út á pönnuna og blandið því saman við olíuna. Bætið soðvatninu saman við og setjið safa og börk úr 1-2 litlum sítrónum yfir spaghettíið (Það er mjög mikið smekksatriði hversu mikil sítróna má vera í réttinum).

6. Stráið pangrattato og ferskri steinselju yfir spaghettíið . Bætið við ólífuolíu, sítrónusafa, svörtum pipar, chili og steinselju eftir smekk.


Leave a Reply

Your email address will not be published. Required fields are marked *

9 + 3 =